Storia

LA CUMETA DI HALLEY, AL CIEL, LA MAN DAL SIGNUR, UL SERFONTANA … E LA SPACATIMPAN

Cureva al 1986 e la cumeta da Halley che la mancava da 76 an, l’eva scià cul so carich da sfiga …A genar, in ciel, sa disintegraà l’Challanger e in moort 7 astronauti.In april è sciupaà l’reataur nümar quatar da Chernobyl e la purtaa mort e distrüziunSül ciel da meza Europa è rivaa una nüvula da tosich e al magrun da Belinzona al diseva da spazetà l’insalata … ma sa po’ !!!In giügn ai mundiali da fotball “la man dal Signur” l’ha pürgaa l’Inghilterra e l’ha ciulaa l’titul mundial !E la Spacatimpan? …… calma … a spazetà l’insalata … sa fa fadiga !

LA NASCITA

Qui da la Regulizia Band che avevan cataa sü i tocch da quii quatar ciucatt di Magiorott ievan fö da cò !Incevi a tütt i tusann di Momo Girls ga bateva la vena e ievan metüü peesch !!Al Momo bar ul Lalo l’è reüsii a fa balà l’Mario, l’Bruno, l’Riga cun la zia e ala fin i sann tiraa insema.In pooch temp i sunaduu da tüt e dô i band parlando cun i soci da lavur, cui amiis, cui amiis di amiis e i me cojoni … in reüsii a tirà sü una trentena da personDopu un para da ciocch…ops riüniun al Giardinetto da Ciass, a fin estaa è nasüü finalment la Spacatimpan Ciass Oorchestra !Ndr. Al nom l’è scrivüü giust cumé da decisiun dal 1986 e la data esata da nascita la dirà ul secretari (il Moro) quand al ritröverà al raport dala riüniun …cioè mai !!!

IL SERFONTANA

In dal milanöövcentvutantasees gheva mia i natel, gheva mia l’e-mail ma gheva al meel che al sa mangiava cul pan !La petegula l’eva la zia: ta navat là a schlapetà e ta na diseva da tüt i culur! Grazie al Bruno ghevum ul lucaal da lavuur e pröva sül tecc … l’eva comud par na a tazà giò da sota!In dal 1987 em fai ul batesim uficiaal ala Gibigiana da Ciass: sunavum anca i sass !! Pö sem nai ai cortei cantunai cun dô novità: i vestii lüseent e i balerinn davanti che i scurlavan al cüü.I’oman dal püblic i capivan pü una maza e i disevan: cudiu se i sonan!Incöö ringrazium qui pori diaui diventaa president dala Spaca: Bruno Müller, Claudio Rigamonti, Mario Moro, Fiorenzo Zappa e Maurizio Lucchini. Roba da mia creed ma quisti oman in riüsii a tegnì insema una banda da matt!In dal 2014 em cambiaa l’president: al Lucki l’ha lasaa e al so posct l’è nai sü l’Claudio Zanotta detto Za.Va disi anca che em traslucaa: dopu tanti ann a Ciass em töi sü i strasc e sem nai a Vacall.A ogni bon cünt la Spacatimpan l’è sempru viscura e la fa cüünt da nà in gir ammò tanti ann ecu parchè:In dal 2016 la giovine Laura Frigerio l’è diventada la prima PRESIDENTA (Boldrini dixit) l’é reschtada düü an e pö la pensaa ben da veert un’usteria!

Ad aprile dal 2019 l’é rivaa lü, l’ex hooligan dal Ciass, presidente eletto Massimo “Max” Dall’Oglio che l’é fö sül teerz balcun e vüna na fa e dees na pensa….l’é mia facil staac a dré!